១២. កីឡាហែលទឹក

១២.១ វិញ្ញាសា

ផ្នែកបុរស (អាយុ១២ឆ្នាំឡើង)	ហែលរបៀបសេរី	៥០ម៉ែត្រ ១០០ម៉ែត្រ ២០០ម៉ែត្រ
	ហែលរបៀបកង្កែប	៥០ម៉ែត្រ ១០០ម៉ែត្រ
	ហែលរបៀបផ្ងារ	៥០ម៉ែត្រ ១០០ម៉ែត្រ
	ហែលរបៀបមេអំបៅ	៥០ម៉ែត្រ ១០០ម៉ែត្រ
	ហែល០៤របៀប ឯកត្តជន	២០០ម៉ែត្រ
	ហែលបណ្តាក់០៤របៀប	១០០ម៉ែត្រ ៤ដង
ផ្នែកនារី (អាយុ១០ឆ្នាំឡើង)	ហែលរបៀបសេរី	៥០ម៉ែត្រ ១០០ម៉ែត្រ ២០០ម៉ែត្រ
	ហែលរបៀបកង្កែប	៥០ម៉ែត្រ ១០០ម៉ែត្រ
	ហែលរបៀបផ្ងារ	៥០ម៉ែត្រ ១០០ម៉ែត្រ
	ហែលរបៀបមេអំបៅ	៥០ម៉ែត្រ ១០០ម៉ែត្រ
	ហែល០៤របៀប ឯកត្តជន	២០០ម៉ែត្រ
	ហែលបណ្តាក់០៤របៀប	១០០ម៉ែត្រ ៤ដង

 

ចំពោះវិញ្ញាសាហែលបណ្តាក់ ក្រុមកីឡាករ ឬកីឡាការិនីក្នុងមួយក្រុម ត្រូវមានសមាជិកជិតចំនួន ០៤នាក់។

ចំពោះគ្រប់វិញ្ញាសាទាំងអស់ កីឡាករឬកីឡាការិនី ដែលបានចុះឈ្មោះក្នុងបញ្ជីនៃការប្រកួត ដែលមានសមាជិកតិចជាង ០៤នាក់នោះ នឹងមិនអនុញ្ញាតឱ្យចុះឈ្មោះប្រកួតឡើយ។ ចំនួនប្រតិភូគ្រូបង្វឹក និងមន្ត្រីចូលរួម ត្រូវមានចំនួន ៣០ភាគរយនៃកីឡាករកីឡាការិនីដែលចូលរួម។

លក្ខ័ណ្ឌនៃការចូលរួមប្រកួតរបស់កីឡាករកីឡាការិនី ប្រតិភូ គ្រូបង្វឹក រួមមាន៖

• មានកាយសម្បទា និងសុខភាពល្អ
• កីឡាករកីឡាការិនីត្រូវមានសញ្ជាតិខ្មែរ
• ត្រូវមានអាយុចាប់ពី ១២ឆ្នាំឡើងទៅ
• កីឡាករកីឡាការិនីអាចមានសិទ្ធិចូលរួមប្រកួតច្រើនបំផុត ០៤វិញ្ញាសា
• កីឡាករកីឡាការិនី គ្រូបង្វឹក ប្រតិភូ ចុះបញ្ជីចូលរួមបានតែមួយវិញ្ញាសាតែប៉ុណ្ណោះ។

១២.២ បទបញ្ជាការប្រកួត (COMPETITION REFULATION)

របៀបនៃការចេញដំណើរ

• ការចេញដំណើរនៅក្នុងទឹកមាន ០២វិញ្ញាសា
  • ការហែលរបៀបផ្ងារ
  • ការហែលបណ្ដាក់ ០៤របៀប
• ការចេញដំណើរនៅលើគោកមាន ០៥វិញ្ញាសា
  • ការហែលរបៀបសេរី
  • ការហែលរបៀបកង្កែប
  • ការហែលរបៀបមេអំបៅ
  • ការហែលរបៀបឯកត្តជន
  • ការហែលរបៀបបណ្ដាក់សេរី

អំពីកំហុសក្នុងការចេញដំណើរ

• បើសិនកីឡាករឬកីឡាការីនី លោតចេញដំណើរមុន ឬធ្លាក់ចូលទឹកមុនការផ្ដើមឱ្យសញ្ញា នោះចាត់ទុកថាជាកំហុស ហើយមិនបានអនុញ្ញាតឱ្យបន្តការហែលជាលើកទីពីរនោះទេ។
• កីឡាករឬកីឡាការិនី ពុំអាចគោះជើងនៅក្នុងទឹកលើសពីចំងាយ ១៥ម៉ែត្របានទេ ចំពោះការចេញដំណើរក្នុងការហែលរបៀបសេរី កង្កែប ផ្ងារ មេអំបៅ បណ្តាក់ និង ០៤របៀបឯកត្តជន។
• កីឡាករកីឡាការិនី ពុំអាចគោះជើងហែលរបៀបមេអំបៅ លើសពី ០១ដងបានទេ ចំពោះការចេញក្នុងការហែលរបៀបកង្កែប។

អំពីការបត់ ឬការមកដល់ទីបញ្ចប់

• នៅក្នុងការបត់ ឬការមកដល់ទីបញ្ចប់ ចំពោះវិញ្ញាសាហែលរបៀបសេរី និងរបៀបផ្ងារ កីឡាករឬកីឡាការិនីទាំងអស់ត្រូវប៉ះជញ្ជាំងដោយផ្នែកណាមួយក៏បាននៃដងខ្លួនជាមុនសិន ទើបចាត់ទុកថាការបត់ ឬការមកដល់ទីបញ្ចប់បានធ្វើឡើងដោយត្រឹមត្រូវតាមបទបញ្ញាបច្ចេកទេស។
• នៅក្នុងការបត់ ឬការមកដល់ទីបញ្ចប់ ការហែលរបៀបកង្កែប និងរបៀបមេអំបៅ កីឡាករ ឬកីឡាការិនីទាំងអស់ត្រូវប៉ះជញ្ជាំងដោយដៃទាំងពីរជាមុនសិន ទើបចាត់ទុកថាការបត់ ឬការមកដល់ទីបញ្ចប់តាមបទបញ្ជាបច្ចេកទេស។

អំពីរបៀបហែល ០៤របៀបឯកត្តជន និងរបៀបហែលបណ្ដាក់

• វិញ្ញាសាហែល ០៤របៀបឯកត្តជន កីឡាករ ឬកីឡាការិនីទាំងអស់ ត្រូវហែលទៅតាមលំដាប់បច្ចេកទេសគឺត្រូវចាប់ផ្ដើមហើយរបៀបមេអំបៅ ផ្ងារ កង្កែប និងចុងក្រោយហែលរបៀបសេរី។
• កីឡាករ ឬកីឡាការិនីក្នុងក្រុមទាំងអស់ត្រូវហែលទៅតាមលំដាប់បច្ចេកទេស គឺហែលរបៀបសេរី។ ពេលមិត្តរួមក្រុមហែលមកដល់ទីប៉ះជញ្ជាំង ទើបកីឡាករ ឬកីឡាការិនីបន្ទាប់ មានសិទ្ធិចាប់ផ្ដើមចេញដំណើរបាន។
• វិញ្ញាសាហែលបណ្ដាក់ ០៤របៀប កីឡាករ ឬកីឡាការិនីក្នុងក្រុមទាំងអស់ ត្រូវហែលទៅតាមលំដាប់បច្ចេកទេស គឺត្រូវចាប់ផ្ដើមដំបូង ហែលរបៀបផ្ងារ របៀបកង្កែប របៀបមេអំបៅនិងចុងក្រោយហែលរបៀបសេរីគ្រប់ បច្ចេកទេសនីមួយៗនៅពេលដែលមិត្តរួមក្រុមហែលមកដល់ទីប៉ះជញ្ជាំង ទើបកីឡាករ ឬកីឡាការិនីបន្ទាប់ មានសិទ្ធិចាប់ផ្ដើមចេញដំណើរបាន។

១២.៣ ការផ្លាស់ប្ដូរកីឡាករកីឡាការិនី

• កីឡាករ ឬកីឡាការិនីដែលអាចសុំប្ដូរបានលុះត្រាតែជាកីឡាករ ឬកីឡាការិនីមានឈ្មោះក្នុងបញ្ជីរាយនាមរបស់ ក្រសួង មន្ទីរ រាជធានីដែលបានដាក់ពាក្យសុំចូលរួមប្រកួត។
• កីឡាករ ឬកីឡាការិនីដែលអាចសុំប្ដូរបាន លុះត្រាតែប្រតិភូ ឬគ្រូបង្វឹក បានសរសេរជាលាយលក្ខណ៍អក្សរ ដោយមានចុះហត្ថលេខាត្រឹមត្រូវ រួចបញ្ជូនទៅឱ្យប្រធានលេខាតុ រយៈពេល ៣០នាទីមុនពេលចាប់ផ្ដើមប្រកួតលើវិញ្ញាសានីមួយៗ ក្នុងថ្ងៃនីមួយៗ។

១២.៤ ការកំណត់ចំណាត់ថ្នាក់និងបំពាក់មេដាយ

• កីឡាករ ឬកីឡាការិនីត្រូវបានចាត់ទុកជាអ្នកជាប់ចំណាត់ថ្នាក់ លុះត្រាតែជាកីឡាករ ឬកីឡាការិនីដែលហែលក្នុងថេរវេលាតិចជាងគេ បន្តបន្ទាប់គ្នាពីចំណាត់ថ្នាក់លេខ១ លេខ២ លេខ៣ ក្នុងវិញ្ញាសានីមួយៗ។
• ចំពោះក្រុមហែលបន្ដាក់ ត្រូវបានចាត់ទុកជាក្រុមជាប់ចំណាត់ថ្នាក់ លុះត្រាតែក្រុមមួយនោះហែលក្នុងថេរវេលាតិចជាងគេ បន្តបន្ទាប់គ្នា ពីចំណាត់ថ្នាក់លេខ១ លេខ២ លេខ៣ ក្នុងវិញ្ញាសារនីមួយៗ។
• ពិធីបំពាក់មេដាយ នឹងត្រូវធ្វើឡើងក្រោយការប្រកួតចប់ នៅក្នុងថ្ងៃនីមួយៗ។
• កីឡាករ ឬកីឡាការិនី ត្រូវមានសំលៀកបំពាក់សមរម្យដែលជាឯកសណ្ឋានផ្លូវការ ដែលតំណាងឱ្យក្រសួង មន្ទីរ រាជធានី ក្លឹប ឬសមាគមរបស់ខ្លួន។

១២.៥ ការតវ៉ា

• រាល់ការតវ៉ាត្រូវសរសេរជាលាយលក្ខណ៍អក្សរ ដោយមានចុះហត្ថលេខា របស់អ្នកដឹកនាំក្រុម ឬគ្រូបង្វឹក នឹងមានភ្ជាប់ជាមួយនូវទឹកប្រាក់ជាសិទ្ធិតវ៉ាចំនួន ១០០,០០០ រៀល (១០ម៉ឺនរៀល)​ ជូនមកគណៈកម្មការរៀបចំការប្រកួត មិនឱ្យលើសពី ៣០នាទីក្រោយពីមានបញ្ហាកើតឡើង។ គណៈកម្មការនឹងធ្វើការឆ្លើយតបវិញក្នុងរយៈពេលមិនអោយលើសពី ៦០នាទីបន្ទាប់ពីទទួលបានលិខិត។ ក្នុងករណីការតវ៉ាមិនមានប្រសិទ្ធភាព នោះគណៈកម្មការបច្ចេកទេសនឹងមិនបង្វិលថវិកាជូនវិញឡើយ។
• បើសិនកីឡាករ ឬកីឡាការិនីរបស់ក្រសួង មន្ទីរ រាជធានី ខេត្ត ក្លឹប ឬសមាគមដែលបានចុះឈ្មោះប្រកួតរួចហើយ មិនព្រមចូលរួមប្រកួត ឬអវត្តមានដោយមិនមានផ្ដល់ដំណឹងមក គណៈកម្មការរៀបចំការប្រកួតជាមុននោះ ក្រសួង មន្ទីរ រាជធានី ខេត្ត ក្លឹប ឬសមាគមនោះ នឹងត្រូវពិន័យជាទឹកប្រាក់ចំនួន ១០០,០០០ រៀល   (១០ម៉ឺនរៀល) ចំពោះកីឡាករ ឬកីឡាការនីដែលអវត្តមានក្នុងមួយនាក់។
• រាល់ការសម្រេចរបស់គណៈកម្មការបច្ចេកទេសរៀបចំការប្រកួតជាការសម្រេចចុងក្រោយគ្មានឧទ្ទរណ៍ ។